Библия на церковно-славянском языке - транслитерация современным русским алфавитом
(1751)

Книга пророка Амоса

◄◄ | ◄ | Глава ⚫ | ► | ►►

¹ Сице показа ми Господь Бог: и се, сосуд птицеловца.

² И рече (Господь): что ты видиши, Амосе? И рех: сосуд птицеловца. И рече Господь ко мне: приспе конец на люди Моя Израиля, не приложу ксему еже мимоити его.

³ И восплачутся стропове храма в той день, глаголет Господь Бог: мнози падшии во всем месте, навергу молчание.

⁴ Слышите убо сия, сокрушающии из утра убогаго и насильствующии нищих от земли,

⁵ глаголющии: когда прейдет месяц, и продамы, и (когда прейдут) субботы, и отверзем сокровища наша, еже сотворити меру малу, и увеличити мерило, и сотворити вес неправеден,

⁶ яко да притяжем убогия сребром и нищаго за сапоги, и от всякаго жита куплю сотворим?

⁷ Кленется Господь на презорство Иаковле, аще забудет в конец вся дела ваша:

⁸ и о сих не возмятется ли земля, и восплачется всяк живяй на ней? И взыдет яко река скончание (ея), и снидет якоже река Египетская.

⁹ И будет в той день, глаголет Господь Бог, зайдет солнце в полудне, и померкнет на земли в день свет:

¹⁰ и превращу праздники вашя в жалость и вся песни вашя в плачь, и возложу на всяк хребет вретище и на всяку главу плешь, и положу его яко жалость любимаго и сущыя с ним яко день болезни.

¹¹ Се, дние грядут, глаголет Господь, и послю глад на землю, не глад хлеба, ни жажду воды, но глад слышания слова Господня:

¹² и поколеблются воды от моря до моря и от севера до восток, и обтекут ищуще словесе Господня, и не обрящут.

¹³ В той день оскудеют девы добрыя и юноши в жажди,

¹⁴ кленущиися очищением Самарийским и глаголющии: жив бог твой, Дане, и жив бог твой, Вирсавее. И падут и не востанут ктому.