Библия на церковно-славянском языке - транслитерация современным русским алфавитом
(1751)

Книга пророка Амоса

◄◄ | ◄ | Глава ⚫ | ► | ►►

¹ Сице показа ми Господь Бог, и се, приплод пружий идый утренний, и се, гусеница, един Гог царь.

² И будет, аще скончает ядый траву земную, и рех: Господи, Господи, милостив буди, кто возставит Иакова? Яко мал есть.

³ Раскайся о сем, Господи: и сие не будет, глаголет Господь.

⁴ Сице показа ми Господь, и се, призва прю во огни Господь Бог, и пояде бездну многу, и пояде часть.

⁵ И рех: Господи, Господи, престани ныне, кто возставит Иакова? Яко мал есть.

⁶ Раскайся о сем, Господи: и сие не будет, глаголет Господь.

⁷ Сице показа ми Господь: и се, Муж стояй на ограде адамантове, и в руце Его адамант.

⁸ И рече Господь ко мне: что ты видиши, Амосе? И рех: адамант. И рече Господь ко мне: се, Аз учиню адаманта среде людий Моих Израиля, ктому не приложу, еже мимоити его:

⁹ и потребятся требища смеха, и требы Израилевы опустеют, и востану на дом Иеровоамль со оружием.

¹⁰ И посла Амасиа жрец Вефильский ко Иеровоаму царю Израилеву глаголя: развраты творит на тя Амос среде дому Израилева, не возможет земля подяти всех словес его,

¹¹ понеже сия глаголет Амос: оружием скончается Иеровоам, Израиль же пленен отведется от земли своея.

¹² И рече Амасиа ко Амосови: видяй гряди и отиди ты на землю Иудину, и тамо живи, и тамо да прорицаеши:

¹³ а в Вефили посем не приложи прорицати, яко освящение царя есть и дом есть царства.

¹⁴ И отвеща Амос и рече ко Амасии: не бех пророк аз, ниже сын пророчь, но пастырь бех и ягодичия обирая:

¹⁵ и поя мя Господь от овец и рече ко мне: иди и прорцы на люди Моя Израиля.

¹⁶ И ныне слыши слово Господне: ты глаголеши: не прорицай на Израиля и не возмущай народа на дом Иаковль:

¹⁷ сего ради сия глаголет Господь: жена твоя во граде соблудит, сынове же твои и дщери оружием падут, и земля твоя ужем измерится, и ты на земли нечистей скончаешися, и Израиль пленен отведется от земли своея.