Библия на церковно-славянском языке - транслитерация современным русским алфавитом
(1751)

Книга пророка Амоса

◄◄ | ◄ | Глава ⚫ | ► | ►►

¹ Люте уничижающым Сиона и уповающым на гору Самарийскую: оымаша начатки языков, и внидоша к ним дом Израилев.

² Мимоидите Халану вси и видите, и прейдите оттуду во Емаф великий и снидите оттуду в Геф иноплеменников, крепчайшыя от всех царств сих, аще болши суть пределы их предел ваших?

³ Приходящии в день зол, приближающиися и прикасающиися субботам лживым,

⁴ спящии на одрех от костей слоновых и ласкосердствующии на постелех своих, ядущии козлища от паств и телцы млеком питаемы от среды стад:

⁵ плещущии ко гласу пищалей, аки стояща мнеша, а не яко бежаща:

⁶ пиющии процеженое вино и первыми вонями мажущиися, и не страдаху ничесоже в сокрушении Иосифове.

⁷ Сего ради ныне пленницы будут от начала сильных, и отимется ржание конско от Ефрема.

⁸ Яко клятся Господь Собою, глаголет Господь Бог Сил: понеже гнушаюся аз всею укоризною Иакова и села его возненавидех, и отвергу град со всеми живущими в нем.

⁹ И будет, аще останутся десять мужей во единем дому, умрут, и останутся остаточнии:

¹⁰ и возмут свои их, и понудятся изнести кости их из дому. И речет настоятелем дому: еще ли есть у тебе? И речет: несть еще. И речет: молчи, не именования ради имене Господня.

¹¹ Понеже, се, Господь заповедает и побиет дом великий толчением и дом малый разседением.

¹² Аще поженут в камениях кони? И аще умолкнут в женстем полу? Яко обратисте на гнев суд, и плод правды на горесть,

¹³ веселящиися ни о единем слове блазе, глаголющии: не крепостию ли нашею имамы роги?

¹⁴ Темже, се, Аз воздвигну на вы, доме Израилев, язык, глаголет Господь Бог Сил, и сокрушат вас еже не внити во Емаф и до водотечи западов.