Библия на церковно-славянском языке - транслитерация современным русским алфавитом
(1751)

Книга пророка Амоса

◄◄ | ◄ | Глава ⚫ | ► | ►►

¹ Слышите слово сие, еже глагола Господь на вы, доме Израилев, и на все племя, еже изведох из земли Египетския, рекий:

² вас точию познах от всех племен на земли, сего ради отмщу на вас вся грехи вашя.

³ Еда пойдут два вкупе всяко, аще не познают себе?

⁴ Или возревет лев из дубравы своея, ловитвы не имый? Или испустит глас свой львичищь из ложа своего всяко, аще не похитит чесого?

⁵ Или падет птица на землю без ловца? Или спадет пругло на землю, аще не имет ничесоже?

⁶ Или возгласит труба во граде, и не убоятся людие? Или будет зло во граде, еже Господь не сотвори?

⁷ Понеже не сотворит Господь Бог дела, аще не открыет наказания Своего к рабом Своим пророком.

⁸ Лев возревет, и кто не убоится? Господь Бог глагола, и кто не проречет?

⁹ Поведите странам во Ассирианех и во странах Египетских и рцыте: соберитеся на гору Самарийскую и видите чудесная многа среде ея и насильство еже в ней.

¹⁰ И не уразуме, яже будут противу ей, глаголет Господь, сокровищствующии неправду и страсть в селех своих.

¹¹ Сего ради сия глаголет Господь Бог: Тире, окрест земля твоя опустеет, и отимет от тебе крепость твою, и разграбятся страны твоя.

¹² Сия глаголет Господь: якоже пастух, егда исторгнет от уст львовых две голени, или обушие уха, тако исторгнутся сынове Израилевы живущии в Самарии прямо племене и в Дамасце.

¹³ Жерцы, послушайте и засвидетелствуйте дому Иаковлю, глаголет Господь Бог Вседержитель:

¹⁴ понеже в день, егда отмщу нечестия Израилева на нем, и отмщу на требищих Вефилих, и раскопаю роги требища, и падутся на землю:

¹⁵ сокрушу и поражу дом с преклеты с домом летним, и погибнут домове кости слоновыя, и потребятся и друзии домове мнози, глаголет Господь.