Библия на церковно-славянском языке - транслитерация современным русским алфавитом
(1751)

Книга пророка Амоса

◄◄ | ◄ | Глава ⚫ | ► | ►►

¹ Сия глаголет Господь: за три нечестия Моавля и за четыри не отвращуся его, понеже сожгоша кости царя Идумейска в пепел:

² и послю огнь на Моава, и пояст основания градов его, и умрет со безсилием Моав, с воплем и гласом трубным:

³ и потреблю судию из него и вся князи его избию с ним, глаголет Господь.

⁴ Сия глаголет Господь: за три нечестия сынов Иудиных и за четыри не отвращуся их, понеже отринуша закон Господень и повелений Его не сохраниша, и прельстиша их суетная их, яже сотвориша, имже последоваша отцы их вслед их:

⁵ и послю огнь на Иуду, и пояст основания Иерусалимля.

⁶ Сия глаголет Господь: за три нечестия Израиля и за четыри не отвращуся его, понеже продаша праведнаго на сребре и убогаго на сапозех,

⁷ ходящих на прасе земнем, и бияху пястию во главы убогих, и путь смиренных совращаху: и сын и отец его влазяста ко единей рабыни, яко да осквернавят имя Бога своего:

⁸ и ризы своя связующе ужами, и завесы творяху держащыяся требища, и вино от оболганий пияху в дому бога своего.

⁹ Аз же отвергох Аморреа от лица их, егоже бе высота якоже высота кедрова, и крепок бяше якоже дуб, и изсуших плод его с верха и корение его из низу.

¹⁰ Аз же изведох вы из земли Египетския и обводих вы в пустыни четыредесять лет, еже прияти в наследие землю Аморрейску.

¹¹ И поях от сынов ваших во пророки и от юнот ваших во освящение: еда несть сих, сынове Израилевы? Глаголет Господь.

¹² И напаясте освященныя вином и пророком заповедасте глаголюще: не прорицайте.

¹³ Сего ради, се, Аз повращу под вами, якоже вратится колесница полна тростия:

¹⁴ и погибнет бегство от скоротекущаго, и крепкий не удержит крепости своея, и храбрый не спасет души своея,

¹⁵ и стреляяй из лука не постоит, и быстрый ногама своима не уцелеет, и конник не спасет души своея,

¹⁶ и крепкий не обрящет сердца своего в силах, наг побегнет в той день, глаголет Господь.