Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Actus Apostolorum

◄◄ | ◄ | Глава ⚫ | ► | ►►

¹ in diebus autem illis crescente numero discipulorum factus est murmur Graecorum adversus Hebraeos eo quod dispicerentur in ministerio cotidiano viduae eorum

² convocantes autem duodecim multitudinem discipulorum dixerunt non est aequum nos derelinquere verbum Dei et ministrare mensis

³ considerate ergo fratres viros ex vobis boni testimonii septem plenos Spiritu et sapientia quos constituamus super hoc opus

⁴ nos vero orationi et ministerio verbi instantes erimus

⁵ et placuit sermo coram omni multitudine et elegerunt Stephanum virum plenum fide et Spiritu Sancto et Philippum et Prochorum et Nicanorem et Timonem et Parmenam et Nicolaum advenam Antiochenum

⁶ hos statuerunt ante conspectum apostolorum et orantes inposuerunt eis manus

⁷ et verbum Dei crescebat et multiplicabatur numerus discipulorum in Hierusalem valde multa etiam turba sacerdotum oboediebat fidei

⁸ Stephanus autem plenus gratia et fortitudine faciebat prodigia et signa magna in populo

⁹ surrexerunt autem quidam de synagoga quae appellatur Libertinorum et Cyrenensium et Alexandrinorum et eorum qui erant a Cilicia et Asia disputantes cum Stephano

¹⁰ et non poterant resistere sapientiae et Spiritui quo loquebatur

¹¹ tunc submiserunt viros qui dicerent se audisse eum dicentem verba blasphemiae in Mosen et Deum

¹² commoverunt itaque plebem et seniores et scribas et concurrentes rapuerunt eum et adduxerunt in concilium

¹³ et statuerunt testes falsos dicentes homo iste non cessat loqui verba adversus locum sanctum et legem

¹⁴ audivimus enim eum dicentem quoniam Iesus Nazarenus hic destruet locum istum et mutabit traditiones quas tradidit nobis Moses

¹⁵ et intuentes eum omnes qui sedebant in concilio viderunt faciem eius tamquam faciem angeli