Библия на церковно-славянском языке - транслитерация современным русским алфавитом
(1751)

Деяния апостолов

◄◄ | ◄ | Глава ⚫ | ► | ►►

¹ Глаголющым же им к людем, наидоша на них священницы и воевода церковный и саддукее,

² жаляще си, за еже учити им люди и возвещати о Иисусе воскресение мертвых:

³ и возложиша на них руки и положиша их в соблюдение до утрия: бе бо вечер уже.

⁴ Мнози же от слышавших слово вероваша: и бысть число мужей яко тысящ пять.

⁵ Бысть же наутрие собратися князем их и старцем и книжником во Иерусалим,

⁶ и Анне архиерею и Каиафе и Иоанну и Александру, и елицы беша от рода архиерейска:

⁷ и поставльше их посреде, вопрошаху: коею силою или коим именем сотвористе сие вы?

⁸ Тогда Петр, исполнився Духа Свята, рече к ним: князи людстии и старцы Израилевы,

⁹ аще мы днесь истязуеми есмы о благодеянии человека немощна, о чесом сей спасеся,

¹⁰ разумно буди всем вам и всем людем Израилевым, яко во имя Иисуса Христа Назореа, Егоже вы распясте, Егоже Бог воскреси от мертвых, о Сем сей стоит пред вами здрав:

¹¹ Сей есть камень укореный от вас зиждущих, бывый во главу угла, и несть ни о единем же инем спасения:

¹² несть бо иного имене под небесем, даннаго в человецех, о немже подобает спастися нам.

¹³ Видяще же Петрово дерзновение и Иоанново и разумевше, яко человека некнижна еста и проста, дивляхуся, знаху же их, яко со Иисусом беста:

¹⁴ видяще же исцелевшаго человека с нима стояща, ничтоже имяху противу рещи.

¹⁵ Повелевше же има вон из сонмища изыти, стязахуся друг со другом,

¹⁶ глаголюще: что сотворим человекома сима? Яко убо нарочитое знамение бысть има, всем живущым во Иерусалиме яве, и не можем отврещися:

¹⁷ но да не более прострется в людех, прещением да запретим има ктому не глаголати о имени сем ни единому от человек.

¹⁸ И призвавше их, заповедаша има отнюд не провещавати ниже учити о имени Иисусове.

¹⁹ Петр же и Иоанн отвещавша к ним реста: аще праведно есть пред Богом вас послушати паче, нежели Бога, судите:

²⁰ не можем бо мы, яже видехом и слышахом, не глаголати.

²¹ Они же призапрещше има, пустиша я, ничтоже обретше како мучити их, людий ради, яко вси прославляху Бога о бывшем:

²² лет бо бяше множае четыредесяти человек той, на немже бысть чудо сие исцеления.

²³ Отпущена же бывша приидоста ко своим и возвестиста, елика к нима архиерее и старцы реша.

²⁴ Они же слышавше единодушно воздвигоша глас к Богу и рекоша: Владыко, ты, Боже, сотворивый небо и землю и море и вся, яже в них,

²⁵ иже Духом Святым усты отца нашего Давида отрока Твоего рекл еси: вскую шаташася языцы, и людие поучишася тщетным?

²⁶ Предсташа царие земстии, и князи собрашася вкупе на Господа и на Христа Его.

²⁷ Собрашася бо воистинну во граде сем на Святаго Отрока Твоего Иисуса, Егоже помазал еси, Ирод же и Понтийский Пилат с языки и людьми Израилевыми,

²⁸ сотворити, елика рука Твоя и совет Твой преднарече быти:

²⁹ и ныне, Господи, призри на прещения их и даждь рабом Твоим со всяким дерзновением глаголати слово Твое,

³⁰ внегда руку Твою прострети Ти во исцеления, и знамением и чудесем бывати именем Святым Отрока Твоего Иисуса.

³¹ И помолившымся им, подвижеся место, идеже бяху собрани, и исполнишася вси Духа Свята и глаголаху слово Божие со дерзновением.

³² Народу же веровавшему бе сердце и душа едина, и ни един же что от имений своих глаголаше свое быти, но бяху им вся обща.

³³ И велиею силою воздаяху свидетелство Апостоли воскресению Господа Иисуса Христа, благодать же бе велия на всех их.

³⁴ Не бяше бо нищь ни един в них: елицы бо господие селом или домовом бяху, продающе приношаху цены продаемых

³⁵ и полагаху при ногах Апостол: даяшеся же коемуждо, егоже аще кто требоваше.

³⁶ Иосиа же, нареченный Варнава от Апостол, еже есть сказаемо сын утешения, левит, Кипрянин родом,

³⁷ имея село, продав принесе цену и положи пред ногами Апостол.