Библия на церковно-славянском языке - транслитерация современным русским алфавитом
(1751)

Деяния апостолов

◄◄ | ◄ | Глава ⚫ | ► | ►►

¹ И нецыи сшедше от Иудеи, учаху братию, яко аще не обрежетеся по обычаю Моисеову, не можете спастися.

² Бывшей же распри и стязанию не малу Павлу и Варнаве к ним, учиниша взыти Павлу и Варнаве и неким другим от них ко Апостолом и старцем во Иерусалим о вопрошении сем.

³ Они же убо, предпослани бывше от церкве, прохождаху Финикию и Самарию, поведающе обращение языков, и творяху радость велию всей братии.

⁴ Пришедше же во Иерусалим, прияти быша от церкве и Апостол и старец, сказаша же, елика сотвори Бог с ними и яко отверзе языком дверь веры.

⁵ Восташа же нецыи от ереси фарисейския веровавшии, глаголюще, яко подобает обрезати их, завещавати же блюсти закон Моисеов.

⁶ Собрашася же Апостоли и старцы ведети о словеси сем.

⁷ Многу же взысканию бывшу, востав Петр рече к ним: мужие братие, вы весте, яко от дний первых Бог в нас избра усты моими услышати языком слово Благовестия и веровати:

⁸ и Сердцеведец Бог свидетелствова им, дав им Духа Святаго, якоже и нам,

⁹ и ничтоже разсуди между нами же и онеми, верою очищь сердца их:

¹⁰ ныне убо что искушаете Бога, (хотяще) возложити иго на выи учеником, егоже ни отцы наши, ни мы возмогохом понести?

¹¹ Но благодатию Господа Иисуса Христа веруем спастися, якоже и они.

¹² Умолча же все множество и послушаху Варнавы и Павла поведающею, елика сотвори Бог знамения и чудеса во языцех има.

¹³ По умолчании же ею, отвеща Иаков глаголя: мужие братие, послушайте мене:

¹⁴ Симеон поведа, яко прежде Бог посети прияти от язык люди о имени Своем:

¹⁵ и сему согласуют словеса пророк, якоже пишет:

¹⁶ по сих обращуся и созижду кров Давидов падший, и раскопаная его созижду и исправлю его,

¹⁷ яко да взыщут прочии человецы Господа, и вси языцы, в нихже наречеся имя Мое, глаголет Господь, творяй сия вся.

¹⁸ Разумна от века суть Богови вся дела Его.

¹⁹ Сего ради аз сужду не стужати от язык обращающымся к Богу,

²⁰ но заповедати им огребатися от треб идолских и от блуда и удавленины и от крове, и елика неугодна себе суть, иным не творити.

²¹ Моисей бо от родов древних по всем градом проповедающыя его имать, в сонмищих по вся субботы чтомый.

²² Тогда изволися Апостолом и старцем со всею церковию, избравше мужа от них, послати во Антиохию с Павлом и Варнавою, Иуду нарицаемаго Варсаву, и Силу, мужа нарочита в братии,

²³ написавше рукама их сия: Апостоли и старцы и братия, сущым во Антиохии и Сирии и Киликии братиям, иже от язык, (о Господе) радоватися.

²⁴ Понеже слышахом, яко нецыи от нас изшедше возмутиша вас словесы, развращающе душы вашя, глаголюще обрезатися и блюсти закон, имже мы не завещахом:

²⁵ изволися нам собравшымся единодушно, избранныя мужы послати к вам, с возлюбленныма нашима Варнавою и Павлом,

²⁶ человекома предавшема душы своя о имени Господа нашего Иисуса Христа:

²⁷ послахом убо Иуду и Силу, и тех словом сказующих таяжде:

²⁸ изволися бо Святому Духу и нам, ничтоже множае возложити вам тяготы, разве нуждных сих:

²⁹ огребатися от идоложертвенных и крове, и удавленины и блуда: и елика не хощете вам быти, другим не творите: от нихже соблюдающе себе, добре сотворите. Здравствуйте.

³⁰ Они же убо послани бывше приидоша во Антиохию, и собравше народ, вдаша послание.

³¹ Прочетше же, возрадовашася о утешении.

³² Иуда же и Сила, и та пророка суща, словом мнозем утешиста братию и утвердиста.

³³ Пребывша же тамо время, отпущена быста с миром от братий ко Апостолом.

³⁴ Изволися же Силе пребыти тамо, Иуда же возвратися во Иерусалим.

³⁵ Павел же и Варнава живяста во Антиохии, учаща и благовествующа слово Господне, и со инеми многими.

³⁶ По неких же днех рече Павел к Варнаве: возвращшеся подобает посетити братию нашу во всех градех, в нихже проповедахом слово Господне, како пребывают.

³⁷ Варнава же восхоте пояти с собою Иоанна нарицаемаго Марка:

³⁸ Павел же глаголаше отступльшаго от наю от Памфилии и не шедшаго с нама на дело, на неже послани быхом, не пояти сего с собою.

³⁹ Бысть убо распря, яко отлучитися има от себе: Варнава убо поемь Марка отплы в Кипр:

⁴⁰ Павел же избрав Силу изыде предан благодати Божией от братий,

⁴¹ прохождаше же Сирию и Киликию, утверждая церкви.